ساتوري: حسين عقل يستطيع بشغفه

أن يحول حياتك ١٨٠ درجة

بقلم : وسام نبيل

مين فينا مش بيتمنى إن حياته تتشقلب 180 درجة و يحصل فيها التغيير اللى محتاجه

مين فينا مش حابب إن أى شىء واقف فى طريق نجاحه مهما كان صغير أو كبير إنه يقدر يتغلب عليه عشان يوصل للى بيحلم بيه

مين فينا مش بيدور على شخص يقف فى ظهره ويدعمه فى أفكاره و قرارته و أحلامه مهما كانت تافهة أو الناس شايفنها مجنونة

طب لو قلتلك إن شغف النهاردة شقلب حياة صاحبه لحياة كلنا بنتمناها

شغف النهاردة هو مزيج بين حاجتين المغامرة و علم النفس

و صاحب الشغف ده هو حسين عقل

 حسين عقل خرج بره الصندوق بفكرة قدر فيها إنه يدمج أكتر مجالين بيحبهم و شغوف بيهم و شقلب بيهم حياة ناس كتير

إزاى؟ ... خلينا نبدأ من البداية

والد حسين عقل كان عنده حلم و حكى الحلم ده لإبنه حسين اللى كان وقتها شايف من وجهة نظره إن حلم والده تافه .. حلمه كان إنه ينظم سباق عجل ضخم يشارك فيه ناس كتير ويكون فيه رعاة للسباق لكن والده كان منتظر ينفذ حلمه بعد سنتين و بعد طلوعه على المعاش لكن اللى حصل إن بعد يومين توفى والده

كانت صدمة كبيرة لحسين وكان فى نفس الوقت درس ليه ... اتعلم منه إن الواحد مش ضامن وقته فى الحياة عشان نأجل فى أحلامنا وكمان كان شايف إنه على الأقل كان ممكن يساعد والده و يدعمه حتى لو بكلمة طيبة

قرر من وقتها إنه لازم يعيش حياته ويكون ليها معنى و لو جاتله الفرصة إنه يساعد أى شخص شايفه واقف فى مكانه و مش عارف يوصل لحلمه إنه يدعمه

بالرغم من إن حسين عقل كان عارف قد إيه هو عنده إمكانيات كبيرة إلا إنه كان حاسس نوعا ما بالتوهان. ماكنش قادر يحدد هوعايز إيه بالظبظ ولا قادر يوظف إمكانياته فى حاجه هو بيحبها و ماكنش قدامه إلا إنه يبدأ يجرب و يخبط فى حاجات كتير لحد ما وصل صدفه إنه يلاقى كورس

Passion To Profit  

قدر من خلاله إنه يفهم إزاى يعرف شغفه و إزاى الواحد يعمل مشروع خاص من حاجة هو بيحبها. إكتشف حسين إن شغفه عبارة عن مزيج بين علم النفس و المغامرة وبدأ يفكر في مشروع يساعد الناس من خلاله

بدأ يدور كتير وأثناء بحثه خاض تجربة اتحط فيها في ظروف قاسية جدا في الصحراء. التجربة دي غيرت حاجات كتير جواه وفهم من خلالها حاجات كتير عن نفسه

إكتشف إن التغيير اللى حصل كان سببه هو إنه عرض نفسه للتعلم عن طريق التجربة. بمعنى إن الشخص يتحط فى موقف و يبدأ يعمل علاقة ما بين الموقف ده و بين حاجة موجودة فى حياته

عجبه جدا الموضوع و بدأ يتعمق فيه أكتر و يأخد كورسات فى علم النفس والبرمجة اللغوية العصبية عشان يعرف عنه أكتر

ومع كل اللى إتعرضله حسين من تجارب و مواقف فى حياته ... بداية من رغبته فى وجود معنى لحياته وبعد اكتشافه لنفسه و شغفه وبعد رحلة التغييراللى خاضها وعرف من خلالها سبب التغيير ... وضحت عند حسين فكرة جديدة مش موجود زيها فى مصر والوطن العربى

فكرة قدر يدمج فيها شغفه بعلم النفس و المغامرة مع بعض و يعمل منهم مشروع يساعد الناس على التغيير و يقدملهم الدعم اللى محتاجينه فى حياتهم

و بعد إستعدادات و تحضيرات كتيرة، فى شهر إبريل 2015 طلعت فكرة ساتورى للنور

وهى عبارة عن إننا نستخدم الطبيعة فى التغيير. بمعنى إن الشخص يدخل مع الجبال و البحر فى تجربة و مغامرة تساعده على التغيير وتعرفه حقيقة نفسه و قدراته

حسين بإكتشافه لنفسه وشغفه.. حياته بقت ليها معنى و بقى سبب فى تغيير حياة ناس كتير

اعرف اكتر عن ساتورى من هنا

حياتك مهمة

ووقتنا فى الحياة مش مضمون

ومش مستاهلة منك إنك تأجل أهدافك و أحلامك أكتر من كدة

إبدأ دلوقتى

لأنك تستحق

خلي_شغفك_شغلك#