إيه الحاجة الرئيسية اللي بتتسبب في نجاح أو فشل المشاريع الناشئة؟

أول حاجة الناس بتهتم بيها لما تحب تبدأ مشروع خاص هي دراسة الجدوى

لما تجيلك فكرة وتتحمس ليها، بيكون تركيزك منصب على عمل دراسة جدوى علشان تتأكد من صلاحية وفاعلية فكرتك

ولما بتلاقي دراسة الجدوى ناجحة بتظن إن كدة خلاص النجاح مضمون

بغض النظر إن الأساليب الحديثة لريادة الأعمال أثبتت إن دراسات الجدوى أصبحت مضيعة للوقت وعديمة الفايدة لأن الإحتكاك بأرض الواقع بيبين حاجات كتير لا يمكن تظهر في دراسة الجدوى النظرية

لكن كمان إنت بتغفل عن حاجة مهمة جدا وهي اللي بتتسبب في ٨٠٪ من نجاحك أو فشلك

الحاجة دي هي

شخصية رائد الأعمال

أنا إتدربت على إيدين مايكل جربر الخبير رقم ١ في ريادة الأعمال … كان مدربي الشخصي سنة ٢٠١٦

من المبادئ الأساسية اللي اتعلمتها منه إن الشخص الشاطر في شغله تقنيا مش بالضرورة أبدا يكون ده مؤشر نجاح لو قرر يفتح مشروع في المجال اللي هو شاطر فيه

يعني مثلا لو إنت
software programmer
شاطر … يبقى لو فتحت شركة
software
هتنجح

لإن الأهم من الشطارة ودراسة الجدوى وغيرها، هو هل شخصية رائد الأعمال صحيت جواك ولا لسة نايمة. خلي بالك أنا بقولك صحيت ولا لأ … مش موجودة ولا لأ… لأن كلنا جوانا الشخصية دي بالفطرة، بس بتدفن بسبب التعود على روتين الوظيفة

في فروق جوهرية ما بين طريقة تفكير وسلوك الموظف ورائد الأعمال

من أهم الفروق دي هي إدراك الفرق بين المجهود والنتائج

بمعنى إيه؟

يعني وإنت موظف بتعتقد إن المفروض تترقى أو مرتبك يزيد أو تكافأ بأي شكل نظير تعبك ومجهودك وعدد سنين شغلك مش نظير النتائج اللي إنت بتحققها

لو إنت بتتعب وبتسهر في شغلك بيكون ده بالنسبالك هو المؤشر لاستحقاق المكافأة بغض النظر نتيجة تعبك وسهرك ده إيه

بينما رائد الأعمال كل تركيزه على النتائج… لإنه لو بيتعب وبيسهر وبيبذل مجهود خرافي بس الشركة بتخسر يبقى كل تعبه ده ولا ليه أي لازمة

علشان كدة لما تفتح مشروع خاص لازم يكون كل تركيزك على النتايج مش المجهود اللي بتبذله إنت أو فريق العمل اللي معاك

ده مثال لطريقة التفكير والشخصية اللي لازم تتغير الأول، قبل ما تفكر في فكرة مشروع أو دراسة الجدوى

علشان كدة الخطوة التانية في نظام
Passion To Profit
اسمها
The Practice Phase

دي بعتبرها أهم مرحلة في رحلة تحويل شغفك لمشروع ناجح

واللي فيها مطلوب تمارس شغفك وتستمتع بيه، وفي نفس الوقت تبني الأساس لنجاح مشروعك فيما بعد

الأساس ده مكون من جزئين

الجزء الأول إنك تستكشف المجال اللي إنت بتحبه وتشوف الفرص وأفكار المشاريع الناجحة الموجودة بالفعل

الجزء التاني إنك تصحي وتنشط شخصية رائد الأعمال واللي هتضمن قدرتك على قيادة وإدارة مشروعك بنجاح بعد كدة

افتكر دايما إن مافيش حد يقدر يسيب الشغل ويفتح مشروع ناجح وهو لسة بيفكر بعقلية الموظف، حتى لو فكرة المشروع ناجحة جدا

خلي_شغفك_شغلك#