في التسويق، الكلام سهل
لكن إقناع العميل إنه يثق فيك ويشتري منك، هو التحدي الحقيقي
من أكتر الحاجات اللي بشوفها ناقصة عند رواد الأعمال هي الدليل
Proof
عنصر بسيط، لكنه الأساس اللي بيبني الثقة بينك وبين العميل
خليني أوضح أكتر
أنت بتوعد العميل بحاجة معينة
إن منتجك هيحل مشكلة أو يحقق نتيجة هو محتاجها
لكن لو ما قدمتش دليل واضح على إن كلامك ده حقيقي، العميل مش هيقتنع
وهنا المشكلة
معظم الناس بتركز 80٪ من كلامها للعملاء على خصائص المنتج ومزاياه
لكن لما تيجي عند الدليل، بيبقى يا ضعيف جدا، يا مش موجود أصلا
اسمحلي أشاركك تجربة شخصية مع موضوع الدليل
أنا طول حياتي بكره التقييم
من أيام الكلية وأنا عندي عقدة من فكرة إن حد يقيم شغلي
امتحانات، لجان، درجات... كل ده كان بيخليني مش مرتاح
ولكن في 2021، شاركت في مسرعة أعمال في إنجلترا
واحدة من الخطوات المطلوبة للتخرج بنجاح كانت إنك تقدم على جوائز عالمية علشان تثبت جودة شغلك
الفكرة كانت صعبة عليا جدا
إني أعرض شغلي لحكم لجنة عالمية ... ده كان ضغط نفسي كبير
لكن اتعلمت إن الجوائز دي هتكون دليل قوي لبناء الثقة مع الناس
فقدمت على 6 جوائز ستيفي
دي من أعرق الجوائز اللي بتكرم الأعمال الرائدة حول العالم
المنافسة فيها صعبة جدا لإن بيقدم فيها شركات زي
Aramco, DHL, QNB, Ooredoo, Abdul Latif Jameel, Coca-Cola, Almarai, Allianz
وغيرهم..
و حوالي 8 محكمين في كل جائزة بيقيموا شغلك بناء على معايير صارمة جدا
يعني في المجمل، حوالي 48 محكم من كبار الخبراء في العالم شافوا شغلي
ورغم كل ده الحمد لله، فزت بكل الجوائز اللي قدمت عليها
بالتأكيد تجربة الفوز كانت جميلة جدا
لكن الأهم بالنسبالي كان الدليل اللي خرجت بيه
الجوائز دي بقت شهادة معتمدة على جودة البرامج اللي بنقدمها
و رجعت للوطن العربي مش بس بمصداقية أكبر، لكن بثقة جديدة في اللي بقدمه
الخلاصة:
اهتم بتعظيم عنصر الدليل في البزنس بتاعك
أي وعد لازم معاه دليل قوي
خلي 70٪ من كلامك يركز على الدليل
و30٪ يركز على مزايا المنتج
وهتشوف فرق كبير في استجابة العملاء وثقتهم فيك
لو عايز تتعلم أكتر عن أسرار مدرسة التسويق المباشر، اشترك في برنامج
Online Marketing Masterclass
هتتعلم استراتيجيات بسيطة وعملية تخلّي شغلك يحقق أرباح مستدامة بأقل الإمكانيات
دي مدرسة عريقة لكن قليل جدا اللي فاهمينها صح
مدرسة ساعدتني على مدار ٢٠ سنة إني أبني وأكبّر ٣ شركات بدون فريق تسويق!!
(ودي قصة لمقالة تانية باذن الله)